India vs England 2nd Test: ఇంగ్లాండ్‌తో జరుగుతున్న ఐదు టెస్టుల సిరీస్‌లో భాగంగా రెండో టెస్టులో భారత యువ కెప్టెన్ శుభమన్ గిల్ వరుసగా రెండో సెంచరీ సాధించి అద్భుతమైన ఫామ్‌ను కొనసాగించాడు. ఎడ్జ్‌బాస్టన్ వేదికగా ప్రారంభమైన ఈ మ్యాచ్‌లో టాస్ గెలిచి బౌలింగ్ ఎంచుకున్న ఇంగ్లాండ్‌కు భారత బ్యాట్స్‌మెన్‌లు తగిన రీతిలో సమాధానం ఇచ్చారు. తొలి రోజు ఆట ముగిసే సమయానికి భారత్ 5 వికెట్ల నష్టానికి 310 పరుగులు చేసి పటిష్టమైన స్థితిలో నిలిచింది.
గిల్ మెరుపు శతకం..
భారత జట్టుకు కెప్టెన్‌గా బాధ్యతలు చేపట్టిన తర్వాత శుభమన్ గిల్ అద్భుతమైన ప్రదర్శన కనబరుస్తున్నాడు. లీడ్స్‌లో జరిగిన తొలి టెస్టులో సెంచరీతో అదరగొట్టిన గిల్, ఇప్పుడు ఎడ్జ్‌బాస్టన్‌లో కూడా శతకంతో మెరిశాడు. 216 బంతుల్లో 12 ఫోర్లతో 114 పరుగులతో అజేయంగా నిలిచి జట్టుకు వెన్నెముకగా నిలిచాడు. క్లిష్ట పరిస్థితుల్లో వికెట్లు పడుతున్నా ఎంతో ఓపికగా ఆడిన గిల్, తనపై ఉన్న బాధ్యతతో నిలకడైన ప్రదర్శనతో జట్టును ఆదుకున్నాడు.
జైస్వాల్ శుభారంభం..
గిల్‌కు తోడు యువ ఓపెనర్ యశస్వి జైస్వాల్ (107 బంతుల్లో 13 ఫోర్లతో 87) శుభారంభం అందించాడు. జైస్వాల్ తన దూకుడు ఆటతో ఇంగ్లాండ్ బౌలర్లపై ఒత్తిడి పెంచాడు. తొలి వికెట్ త్వరగా పడినా, గిల్‌తో కలిసి కీలక భాగస్వామ్యం నెలకొల్పి జట్టుకు మంచి పునాది వేశాడు. అయితే సెంచరీకి చేరువవుతున్న సమయంలో జైస్వాల్ ఔటవడం నిరాశపరిచింది.
ఇంగ్లాండ్ బౌలర్లకు ప్రతిఘటన..
ఇంగ్లాండ్ బౌలర్లలో క్రిస్ వోక్స్ 2 వికెట్లతో రాణించగా, బెన్ స్టోక్స్, బ్రైడన్ కార్స్, షోయబ్ బషీర్ తలా ఒక వికెట్ పడగొట్టారు. అయితే, భారత బ్యాట్స్‌మెన్‌లు గిల్, జైస్వాల్, ఆ తర్వాత రవీంద్ర జడేజా (41 బ్యాటింగ్) ల ప్రతిఘటనతో ఇంగ్లాండ్ బౌలర్లు పెద్దగా ప్రభావం చూపలేకపోయారు. ముఖ్యంగా గిల్, జడేజా ఆరో వికెట్‌కు అజేయంగా 99 పరుగుల భాగస్వామ్యం నెలకొల్పి జట్టును పటిష్టమైన స్థితికి చేర్చారు.
రికార్డుల హోరు..
ఈ సెంచరీతో శుభమన్ గిల్ పలు రికార్డులను తన పేరిట లిఖించుకున్నాడు. కెప్టెన్‌గా ఆడిన తొలి రెండు టెస్టుల్లోనే వరుసగా శతకాలు బాదిన నాలుగో భారత సారథిగా గిల్ నిలిచాడు. విజయ్ హజారే, సునీల్ గవాస్కర్, విరాట్ కోహ్లీ సరసన గిల్ చేరాడు. అలాగే, ఎడ్జ్‌బాస్టన్‌లో అత్యధిక వ్యక్తిగత స్కోరు సాధించిన భారత ఓపెనర్‌గా యశస్వి జైస్వాల్ (87) నిలిచాడు.
మొత్తం మీద, తొలి టెస్టులో ఓటమి పాలైన భారత్, రెండో టెస్టులో కెప్టెన్ శుభమన్ గిల్ అద్భుతమైన శతకంతో పుంజుకొని సిరీస్‌ను సమం చేసే దిశగా దూసుకుపోతోంది. రెండో రోజు గిల్, జడేజా జోడీ రాణిస్తే భారత్ భారీ స్కోరు సాధించి ఇంగ్లాండ్‌పై ఒత్తిడి పెంచే అవకాశం ఉంది.
ఎడ్జ్‌బాస్టన్ టెస్ట్‌కు ముందు లీడ్స్ టెస్ట్‌లో శుభ్‌మాన్ గిల్ కెప్టెన్సీ ఇన్నింగ్స్‌తో ఆకట్టుకున్నాడు. ఆ మ్యాచ్ తొలి ఇన్నింగ్స్‌లో 147 పరుగులు సాధించాడు. ఇందులో 19 ఫోర్లు, 1 సిక్స్ ఉన్నాయి. ఎడ్జ్‌బాస్టన్‌లోనూ సెంచరీతో దూసుకెళ్తున్నాడు. గిల్ టెస్ట్ కెరీర్‌లో ఇది 7వ సెంచరీ. అదే సమయంలో, అతను అంతర్జాతీయ క్రికెట్‌లో మొత్తం 16 సెంచరీలు చేశాడు.
విరాట్ కోహ్లీని సమం చేసిన గిల్..
ఈ సెంచరీతో, శుభ్‌మాన్ గిల్ భారత స్టార్ ఆటగాడు విరాట్ కోహ్లీ రికార్డును సమం చేశాడు. నిజానికి, ఎడ్జ్‌బాస్టన్ మైదానంలో భారత కెప్టెన్‌గా సెంచరీ చేసిన రెండవ కెప్టెన్‌గా గిల్ నిలిచాడు. గతంలో, విరాట్ కోహ్లీ మాత్రమే ఈ ఘనతను సాధించగలిగాడు. 2018లో ఎడ్జ్‌బాస్టన్ మైదానంలో కెప్టెన్‌గా విరాట్ కోహ్లీ సెంచరీ సాధించాడు.
మరిన్ని క్రికెట్‌ వార్తల కోసం ఇక్కడ క్లిక్ చేయండి..
