ఆరోగ్యంగా ఉండేందుకు మనం రోజూ తినే ఆహారంలో పండ్లు, కూరగాయలతో పాటు డ్రై ఫ్రూట్స్‌ను చేర్చుకుంటాము. ముఖ్యంగా కరోనా వైరస్ వెలుగులోకి వచ్చిన తర్వాత తినే ఆహారం పట్ల కేరింగ్ పెరిగిందని చెప్పవచ్చు. అలాంటి ఆరోగ్యకరమైన వాటిల్లో ఒకటి చియా విత్తనాలు. వీటిని బరువు తగ్గడం కోసం ఎక్కువగా ఉపయోగిస్తున్నారు.
వేసవి, శీతాకాలం అనే తేడా లేదు.. ఏ సీజన్ లో అయినా తినే ఆహారంలో చియా గింజలను చేర్చుకోవచ్చు. వీటిని తినడం వలన అనేక ఆరోగ్య ప్రయోజనాలు ఉన్నాయి. అందుకనే వీటిని సూపర్ ఫుడ్ కేటగిరీలో ఉంచారు. అయితే చియా విత్తనాలను తినడానికి కూడా ఒక పద్దతి ఉంది.
చియా విత్తనాలు ఆరోగ్యానికి ఎంతో మేలు చేస్తాయని పోషకాహార నిపుణులు నమామి అగర్వాల్ చెప్పారు. వీటిలో ఒమేగా-3 ఫ్యాటీ యాసిడ్స్, ఫైబర్, ప్రొటీన్, కాల్షియం, యాంటీ ఆక్సిడెంట్లు పుష్కలంగా ఉన్నాయి. ఇవి శరీర అవసరాలను తీర్చడంలో సహాయపడతాయి. అయితే చియా విత్తనాలను తీసుకునేటప్పుడు కొన్ని విషయాలను గుర్తుంచుకోవడం ముఖ్యం. లేదంటే అనేక ఇబ్బందులు పడాల్సి వస్తుంది.
అధిక ఫైబర్ ఆహారాలతో.. పీచు పదార్థాలు ఎక్కువగా ఉండే చియా సీడ్స్ తినకూడదని నిపుణులు చెబుతున్నారు. ఎందుకంటే చియా సీడ్స్ లో ఇప్పటికే అధిక మొత్తంలో ఫైబర్ ఉంది. చియా గింజలను అధిక ఫైబర్ ఆహారాలతో కలిపి తింటే జీర్ణవ్యవస్థకు ఇబ్బంది కరంగా మారుతుంది. జీర్ణవ్యవస్థలో సమస్యలు ఉంటే ఆహార కలయిక అనేక ఇతర ఆరోగ్య సమస్యలకు దారి తీస్తుంది.
పాల ఉత్పత్తులు: చాలామంది చియా గింజలను పాలు లేదా పాల ఉత్పత్తులతో తింటారు. అయితే లాక్టోస్ అసహనం ఉన్నవారు పాల ఉత్పత్తులతో చియా విత్తనాలను తినకూడదు. పాలలో ప్రోటీన్లు, కొవ్వులు ఉంటాయి. చియా గింజల్లోని ఫైబర్‌తో ప్రోటీన్లు కలవడం వలన జీర్ణక్రియను నెమ్మదిస్తుంది. గ్యాస్, ఉబ్బరం లేదా కడుపు తిమ్మిరి వంటి సమస్యలు సంభవించవచ్చు.
చక్కెర ఆహారాలు: చియా గింజలు ఆరోగ్యానికి మేలు చేస్తాయి. అయితే వీటిని చక్కెర అధికంగా ఉన్న ఆహారాలతో కలిపి తింటే.. చియా గింజల సహజ రుచి చాలా తేలికపాటిది. అంతేకాదు చాలా తక్కువ కేలరీలను కలిగి ఉంటాయి. దీంతో ఎక్కువ చక్కెరతో చియా గింజలు తినడం కేలరీలు అధికంగా పెరుగుతాయి.
చియా సీడ్స్ ను పొరపాటున కూడా సిట్రస్ పండ్లతో కలిపి తినొద్దు. కమలాఫలం, ద్రాక్ష, నారింజ వంటి పండ్లతో చియా సీడ్స్ ను కలిపి తింటే జీర్ణ సమస్యలు తలెత్తుతాయి. కనుక చియా గింజలను రోజూ తింటుంటే.. దానిని ఏ పదార్థాలతో తినాలి? వేటితో తినకూడదు అనే విషయాన్ని కూడా గుర్తుంచుకోవాలి.
