భారత స్టార్ పేసర్ జస్ప్రీత్ బుమ్రా గాయంతో 2025 ఐసిసి ఛాంపియన్స్ ట్రోఫీకి దూరమైనప్పటికీ, టీమిండియా విజయావకాశాల్లో ఎటువంటి లోటు ఉండదని బీసీసీఐ కార్యదర్శి దేవజిత్ సైకియా స్పష్టం చేశారు. బుమ్రా స్థానంలో యువ పేసర్ హర్షిత్ రాణా ఎంపిక అవ్వగా, మహమ్మద్ షమీ, అర్ష్‌దీప్ సింగ్, హార్దిక్ పాండ్యా భారత పేస్ దళాన్ని నడిపించనున్నారు.
ఛాంపియన్స్ ట్రోఫీ కోసం అజిత్ అగార్కర్ నేతృత్వంలోని సెలక్షన్ కమిటీ అత్యుత్తమ జట్టును ఎంపిక చేసిందని సైకియా ప్రశంసించారు. “భారత్‌కు గొప్ప బెంచ్ స్ట్రెంత్ ఉంది. జస్ప్రీత్ బుమ్రా లేకపోవడం వల్ల పెద్దగా సమస్యలు రావని నేను నమ్ముతున్నాను. మేము ట్రోఫీని గెలుస్తామని నమ్మకం ఉంది.” అని ఆయన తెలిపారు.
సీనియర్ ఆటగాళ్లు రోహిత్ శర్మ, విరాట్ కోహ్లీ తిరిగి ఫామ్‌లోకి రావడం జట్టుకు కలిసొచ్చే అంశమని సైకియా తెలిపారు. ఇటీవల ఇంగ్లాండ్‌తో జరిగిన వన్డే, టీ20 సిరీస్‌లలో భారత జట్టు అద్భుత ప్రదర్శన ఇచ్చింది. రెండవ వన్డేలో రోహిత్ శర్మ సెంచరీతో మెరవగా , కోహ్లీ తన చివరి వన్డేలో అర్ధ సెంచరీ చేసి ఫామ్‌ను తిరిగి తెచ్చుకున్నాడు. భారత్ 3-0 తేడాతో వన్డే సిరీస్‌ను వైట్‌వాష్ చేసుకుంది. సూర్యకుమార్ నేతృత్వంలో టీ20 సిరీస్‌ను 4-1తో గెలుచుకుంది.
భారత్ మరో ఛాంపియన్స్ ట్రోఫీ గెలిచేనా?
2025 ఐసీసీ ఛాంపియన్స్ ట్రోఫీలో భారత జట్టు పాకిస్తాన్, బంగ్లాదేశ్, న్యూజిలాండ్‌లతో కలిసి గ్రూప్ Aలో ఉంది. ఈ టోర్నమెంట్ ఫిబ్రవరి 19 నుండి మార్చి 9 వరకు పాకిస్తాన్ మరియు దుబాయ్‌లో జరుగుతుంది. భారత్ మరియు పాకిస్తాన్ మధ్య రాజకీయ ఉద్రిక్తతల కారణంగా, భారత జట్టు మ్యాచ్‌లు దుబాయ్‌లో నిర్వహించబడతాయి.
భారత జట్టు ప్రధాన ఫాస్ట్ బౌలర్ జస్ప్రీత్ బుమ్రా, కింది వెన్నునొప్పి కారణంగా టోర్నమెంట్ నుండి తప్పుకున్నారు. ఆయన స్థానంలో హర్షిత్ రాణా జట్టులోకి వచ్చారు. ఇక, యశస్వి జైస్వాల్ స్థానంలో వరుణ్ చక్రవర్తి జట్టులోకి చేరారు.
జస్ప్రీత్ బుమ్రా లేని లోటును భర్తీ చేయడానికి భారత జట్టు సిద్ధంగా ఉంది. రోహిత్ శర్మ, కోహ్లీ ఫామ్‌లో ఉండటంతో పాటు, భారత బౌలింగ్ దళం బలంగా ఉండటం టీమిండియాకు కలిసొచ్చే అంశం. 2013 ఛాంపియన్స్ ట్రోఫీ విజయం తర్వాత, భారత్ మరోసారి ఐసిసి ట్రోఫీ గెలిచేందుకు సిద్ధంగా ఉందా? చూడాలి!
ఈ టోర్నమెంట్‌లో విజేత జట్టు $2.24 మిలియన్ డాలర్ల ప్రైజ్ మనీని పొందుతుంది, మొత్తం ప్రైజ్ పూల్ $6.9 మిలియన్ డాలర్లుగా ఉంది. భారత జట్టు తమ తొలి మ్యాచ్‌ను ఫిబ్రవరి 23న దుబాయ్‌లో పాకిస్తాన్‌తో ఆడనుంది. జట్టు ప్రధాన బౌలర్ జస్ప్రీత్ బుమ్రా గైర్హాజరీతో, యువ బౌలర్లు తమ ప్రతిభను నిరూపించుకోవాల్సిన అవసరం ఉంది.
ఐసిసి ఛాంపియన్స్ ట్రోఫీ 2025 కోసం భారత జట్టు:
రోహిత్ శర్మ (కెప్టెన్), శుభ్‌మాన్ గిల్, విరాట్ కోహ్లీ, శ్రేయాస్ అయ్యర్, కెఎల్ రాహుల్ (వికెట్ కీపర్), రిషబ్ పంత్ (వికెట్ కీపర్), హార్దిక్ పాండ్యా, అక్షర్ పటేల్, వాషింగ్టన్ సుందర్, కుల్దీప్ యాదవ్, హర్షిత్ రాణా, మహమ్మద్ షమీ, అర్ష్‌దీప్ సింగ్, రవీంద్ర జడేజా, వరుణ్ చక్రవర్తి.
స్టాండ్‌బై ఆటగాళ్లు:
యశస్వి జైస్వాల్, మహ్మద్ సిరాజ్, శివం దుబే. అవసరమైనప్పుడు వీరు జట్టులో చేరనున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..
