ఈరోజు వాంఖడే స్టేడియంలో జరుగుతున్న ఐపీఎల్ 2025 మ్యాచ్‌లో ముంబై ఇండియన్స్ (MI) స్టార్ బ్యాట్స్‌మన్ సూర్యకుమార్ యాదవ్ తన అదృష్టాన్ని తిరిగి నిరూపించుకున్నాడు. లక్నో సూపర్ జెయింట్స్ (LSG)తో జరిగిన ఈ మ్యాచ్‌లో సూర్యకుమార్ 54 పరుగులు (28 బంతుల్లో) చేసి, ముంబై ఇన్నింగ్స్ 18వ ఓవర్లో అవేశ్ ఖాన్ బౌలింగ్‌లో అవుట్ అయ్యాడు. ఈ ఇన్నింగ్స్‌తో సూర్యకుమార్ యాదవ్ ఐపీఎల్ చరిత్రలో 4000 పరుగులు చేసిన అత్యంత వేగవంతమైన భారత బ్యాట్స్‌మన్‌గా చరిత్ర సృష్టించాడు. ఈ ఘనతను సాధించేందుకు అతనికి కేవలం 2714 బంతులు మాత్రమే పట్టింది, గతంలో KL రాహుల్ పేరిట ఉన్న 2820 బంతుల రికార్డును సూర్యకుమార్ అధిగమించాడు. ఈ అరుదైన ఘనతతో సూర్యకుమార్ ఇప్పుడు మొత్తం మూడవ స్థానంలో నిలిచాడు, అతని ముందు ఎబి డివిలియర్స్, క్రిస్ గేల్ మాత్రమే ఉన్నారు, వీరిద్దరూ 2658 బంతుల్లో ఈ మైలురాయిని చేరుకున్నారు.
ఈ మ్యాచ్‌లో మరో ముఖ్య ఘట్టంగా సూర్య 150 సిక్సర్ల మైలురాయిని కూడా దాటాడు. రవి బిష్ణోయ్ బౌలింగ్‌లో సిక్స్ కొట్టి ఈ మైలురాయిని అందుకున్నాడు. తన ఇన్నింగ్స్‌లో సూర్య నాలుగు ఫోర్లు, నాలుగు సిక్సర్లు బాదాడు. ఇదే సమయంలో ముంబై ఇండియన్స్ ఇన్నింగ్స్ కూడా వేగంగా ముందుకెళ్లింది. టాస్ గెలిచిన లక్నో కెప్టెన్ రిషబ్ పంత్ బౌలింగ్ ఎంచుకోగా, ముంబై జట్టుకు రోహిత్ శర్మ, ర్యాన్ రికెల్టన్ ఓపెనింగ్ ఇచ్చారు.
రోహిత్ శర్మ మయాంక్ యాదవ్ బౌలింగ్‌కు రెండు సిక్సర్లు కొట్టినా, చివరకు షార్ట్ థర్డ్ మ్యాన్ వద్ద విల్ జాక్స్ చేతికి క్యాచ్ ఇచ్చి వెనుదిరిగాడు. అదే సమయంలో ర్యాన్ రికెల్టన్ పవర్ ప్లేలో అదిరిపోయే ఆటతీరు కనబరిచాడు. అతను కేవలం 24 బంతుల్లోనే 49 పరుగులు చేయడంతో ముంబై 6 ఓవర్లలో 66/1 స్కోరుకు చేరింది. ఆ తర్వాత రికెల్టన్, విల్ జాక్స్ కలిసి రెండో వికెట్‌కు 30 బంతుల్లో 50 పరుగుల భాగస్వామ్యాన్ని నిర్మించారు.
ఈ మ్యాచ్‌లో సూర్యకుమార్ ప్రదర్శన ముంబై అభిమానులను మరిచిపోలేని అనుభూతి ఇచ్చింది, అతని పేరిట మరోసారి ఐపీఎల్ చరిత్రలో కొత్త పుటలు తెరిచాయి. 4000 పరుగుల మార్కును అత్యంత వేగంగా చేరుకున్న మొదటి భారత ఆటగాడిగా నిలిచిన స్కై, తన బ్యాటింగ్‌తో ప్రపంచానికి ముంబై ఇండియన్స్ శక్తిని మరోసారి చూపించాడు.
మరిన్ని ఐపీఎల్ వార్తల కోసం ఇక్కడ క్లిక్ చేయండి..
