ఐపీఎల్ 2025 సీజన్ లో రాజస్థాన్ రాయల్స్ జట్టులో ఒక పెద్ద మార్పు చోటు చేసుకుంది. అనుభవజ్ఞుడైన పేసర్ సందీప్ శర్మ గాయం కారణంగా ఈ సీజన్ నుండి తప్పుకోవాల్సి వచ్చింది. వేలికి తగిలిన గాయం కారణంగా అతను మిగిలిన టోర్నమెంట్‌కు దూరంగా ఉండాల్సి రావడంతో, రాజస్థాన్ మేనేజ్‌మెంట్ అతని స్థానాన్ని భర్తీ చేసేందుకు దక్షిణాఫ్రికా వేగవంతమైన ఎడమచేతి బౌలర్ నాండ్రే బర్గర్‌ను ఎంపిక చేసింది. సందీప్ శర్మ ఇప్పటివరకు ఈ సీజన్‌లో 10 మ్యాచ్‌లు ఆడి కేవలం 9 వికెట్లతోనే పరిమితమయ్యాడు. ఆయన సగటు 40.11 కాగా, స్ట్రైక్ రేట్ 24.33 ఉండటం వల్ల అతని ప్రదర్శన పెద్దగా మెప్పించకపోవడంతో పాటు గాయం కూడా అతనికి ఆటను దూరం చేసింది. దీంతో, బౌలింగ్ విభాగంలో రాజస్థాన్ జట్టు ఇప్పటికే జోఫ్రా ఆర్చర్, హసరంగాలపై ఆధారపడుతూ వచ్చిన నేపథ్యంలో, బర్గర్ లాంటి స్పీడ్ స్టర్ జట్టులో చేరటం కీలక పరిణామంగా మారింది.
నాండ్రే బర్గర్ పేరు గతంలోనే రాజస్థాన్ అభిమానులకు పరిచయమైనదే. గత సీజన్‌లో RR తరఫున ఆరు మ్యాచ్‌లు ఆడిన బర్గర్, 14.57 స్ట్రైక్ రేట్, 8.53 ఎకానమీతో 7 వికెట్లు తీసి తన గొప్ప ప్రతిభను చాటుకున్నాడు. అంతేగాక, టోటల్ గా తన T20 కెరీర్‌లో బర్గర్ 69 మ్యాచ్‌ల్లో 77 వికెట్లు పడగొట్టి, 23.44 సగటు, 18.1 స్ట్రైక్ రేట్‌తో నిలకడగా బౌలింగ్ చేస్తున్నాడు. దక్షిణాఫ్రికా తరఫున అంతర్జాతీయంగా కూడా మంచి వేగంతో బంతిని స్వింగ్ చేయగల సామర్థ్యం కలిగి ఉన్న బర్గర్, గతంలో మెగా వేలంలో అమ్ముడుపోకపోయినా, ఈసారి రూ.3.5 కోట్ల ధరకు రాజస్థాన్ క్యాంప్‌లో చేరాడు. సందీప్ శర్మ స్థానంలో బర్గర్ జట్టులోకి రావడం వల్ల రాయల్స్ బౌలింగ్ దళానికి ఒక ఉత్సాహం వచ్చిందనే చెప్పాలి. జట్టు పునర్‌వ్యవస్థీకరణలో ఈ మార్పు కీలకంగా మారనుంది.
నాండ్రే బర్గర్ జట్టులోకి రావడం వల్ల రాజస్థాన్ రాయల్స్‌కు మరింత సమతుల్యమైన బౌలింగ్ యూనిట్ ఏర్పడే అవకాశం ఉంది. అతని వేగం, యార్కర్లు వేసే నైపుణ్యం, పవర్‌ప్లేలో వికెట్లు తీసే సామర్థ్యం జట్టుకు కీలకంగా నిలవొచ్చు. ముఖ్యంగా ప్లే ఆఫ్స్ సమీపిస్తున్న వేళ, బర్గర్ లాంటి అగ్రశ్రేణి పేసర్ జట్టులో ఉండటం అనుకూలంగా పనిచేయవచ్చు. అతని అంతర్జాతీయ అనుభవం బిగ్ మాచ్‌ లలో కూడా రాయల్స్‌కు ఉపయోగపడేలా ఉంటుందని భావిస్తున్నారు. సందీప్ గాయం కారణంగా ఏర్పడిన లోటును బర్గర్ కొంతవరకు పూడ్చగలడని అభిమానులు ఆశిస్తున్నారు.
మరిన్ని క్రికెట్ వార్తల కోసం ఇక్కడ క్లిక్ చేయండి..
