అమ్మాయిలా వేషధారణ.. నడకలో తేడా రాకుండా జాగ్రత్తలు.. పరిసరాలు స్కాన్.. యాజిటీజ్‌.. అమ్మాయిలానే నడుస్తాడు. వేషంలోనూ.. నడకలోనూ ఎక్కడా తేడా రాకుండా ఎన్నో జాగ్రత్తలు తీసుకుంటాడు. అటు ఇటు తిరగడం.. పరిసరాలను స్కాన్ చేయడం..
రెప్పపాటులో అక్కడ్నుంచి మాయం కావడం.. గత పదేళ్లుగా ఇదే తంతు. పట్టుకోండి చూద్దాం అంటూ ఖాకీలకు సవాల్‌ విసురుతూనే ఉన్నాడు. ఎట్టకేలకు పాపం పండి.. పోలీసులకు చిక్కాడు.
మలాడ్‌, మలవాణి ప్రాంతాల్లో ఎన్నో దొంగతనాలు
చిక్కడు దొరకడు టైపులో తప్పించుకు తిరిగిన ఇతను రంజిత్ కుమార్ సింగ్ అలియాస్ ఉపేంద్ర అలియాస్ మున్నా. వయసు 44ఏళ్లు. బిహార్‌లోని బబువాగంజ్‌ ప్రాపర్‌. మలాడ్‌, మలవాణి ప్రాంతాల్లో ఎన్నో దొంగతనాలు చేశాడు. లోకల్ ఏరియాలో దొంగతనాలు ఎక్కువ కావడంతో కొన్నాళ్లు ముంబైకి మకాం మార్చాడు. అక్కడ కూడా ఖాకీలకు చిక్కకుండా చోరీలు చేశాడు. ఇతనికి స్పైడర్ మ్యాన్ దొంగ అనే పేరుంది. ఎందుకంటే.. ఇళ్లకు ఉండే పైపులు, గోడలు.. అతి సునాయాసంగా ఎక్కేస్తాడు.
Ranjit Kumar Singh
సీసీ కెమెరాలు ఎక్కడున్నాయో తెలుసుకునే ఉపేంద్ర
బురఖా ధరించి చోరీలు చేసేవాడు ఉపేంద్ర. చోరీలకు ముందే సీసీ కెమెరాలు ఎక్కడెక్కడ ఉన్నాయో ఓ కన్నేసే వాడు. దొంగతనాలు చేశాక.. సీసీ కెమెరాలు ఉండే వైపునకు వెళ్లకుండా.. రైల్వే ట్రాక్ మార్గంలో నడుచుకుంటూ స్వస్థలానికి వెళ్లేవాడు. ఇదీ ఉపేంద్ర మోడస్ ఓపెరాండి. చోరీల మీద చోరీలు చేసి సవాల్‌ విసిరిన ఉపేంద్రను పట్టుకునేందుకు వేర్వేరు ప్రాంతాల్లో 150కి పైగా సీసీ కెమెరాల ఫుటేజ్‌ను తిరగేశారు. అందులో దొరికిన ఆధారాలతో ఉపేంద్రను మలవాణి ఏరియాలో అరెస్ట్ చేశారు.
ఖరీదైన ప్లేస్‌లో ల్యాండ్‌లు కొన్నట్టు గుర్తింపు
ఉపేంద్ర నుంచి స్వాధీనం చేసుకున్న సొత్తును చూసి ఖాకీలు షాకయ్యారు. కోట్ల రూపాయల సొత్తు.. అంతకుమించి ఖరీదైన ప్లేస్‌లో ల్యాండ్‌లు కొన్నట్టు గుర్తించారు. 36 తులాల బంగారు, వెండి నగలు, 16లక్షల నగదు, మహిళల దుస్తులు, 57లక్షల విలువ చేసే ఆస్తులతో పాటు గోల్డ్‌ కరిగించే యంత్రాన్ని పోలీసులు స్వాధీనం చేసుకున్నారు. దశాబ్దానికి పైగా చోరీలనే వృత్తిగా మలచుకుని కోట్ల రూపాయలు సంపాదించాడు ఉపేంద్ర.
ఏ రేంజ్‌లో ఆస్తులు కూడబెట్టాడు?
ఉపేంద్ర ఎక్కడెక్కడ చోరీలు చేశాడు..? ఏ స్థాయిలో ఆస్తులు కూడబెట్టాడు..? చోరీ చేసిన సొత్తుతో భూములు కొన్నాడా? అవి ఎక్కడెక్కడ ఉన్నాయనే వివరాలపై పోలీసులు కూపీ లాగుతున్నారు.
