Salim Durani Birthday: భారత మాజీ ఆల్ రౌండర్ సలీం దురానీకి ఎలాంటి గుర్తింపు అవసరం లేదు. 60, 70లలో సలీం దురానీ భారత క్రికెట్‌లో ఆల్ రౌండర్‌గా ప్రత్యేక గుర్తింపు తెచ్చుకున్నాడు. అతను అద్భుతమైన బ్యాట్స్‌మెన్. అతను ఆడటానికి బయటకు వచ్చినప్పుడల్లా, క్రికెట్ మైదానంలో అతన్ని చూడటానికి అభిమానులు గుమిగూడేవారు. సలీం దురానీ ఈ రోజున అంటే 1934 డిసెంబర్ 11న జన్మించారు. సలీం దురానీ అంతర్జాతీయ కెరీర్ తక్కువే అయినప్పటికీ, అతను అదే కాలంలో చాలా పేరు సంపాదించుకున్నాడు. ఆ తర్వాత నటనా ప్రపంచంలోకి కూడా ప్రవేశించాడు.
ఆఫ్ఘనిస్తాన్‌లో జన్మించిన సలీం దురానీ..
సలీం దురానీ పుట్టింది భారతదేశంలో కాదు. ఆఫ్ఘనిస్తాన్‌లోని కాబూల్‌లో కావడం గమనార్హం. కానీ, అతనికి మూడేళ్ల వయస్సు ఉన్నప్పుడు, అతని తల్లిదండ్రులు భారతదేశానికి వచ్చారు. ఆపై సలీం దురానీ భారతదేశం తరపున క్రికెట్ ఆడాడు. సలీం దురానీ అభిమానుల అభిమాన క్రికెటర్‌గా కూడా ఉన్నాడు. ఎందుకంటే, అతను అభిమానుల డిమాండ్లపై సిక్స్‌లు కొట్టేవాడు. సిక్సర్‌కు పిలుపు వచ్చిన స్టేడియంలోని కార్నర్‌ నుంచి దురానీ సిక్సర్ కొట్టి అభిమానులను అలరించేవాడు. అతను బ్యాటింగ్‌కి వచ్చినప్పుడల్లా అభిమానులు ‘మాకు సిక్సర్ కావాలి’ అంటూ నినాదాలు చేసేవారు.
అంతర్జాతీయ క్రికెట్ గురించి మాట్లాడితే.., సలీం దురానీ 1960లో ఆస్ట్రేలియాపై అరంగేట్రం చేశాడు. అయితే, అతను 1973లో ఇంగ్లండ్‌తో తన చివరి టెస్టు ఆడాడు. విశేషమేమిటంటే, అతను తన మొదటి, చివరి మ్యాచ్‌లను ముంబైలోని బ్రబౌర్న్ స్టేడియంలో ఆడాడు. ఈ సమయంలో, అతను భారతదేశం కోసం మొత్తం 29 టెస్టులు ఆడాడు. అందులో అతను ఒక సెంచరీ, ఏడు అర్ధ సెంచరీల సహాయంతో 1202 పరుగులు చేశాడు. ఇది కాకుండా సలీం దురానీ తన కెరీర్‌లో 75 వికెట్లు కూడా పడగొట్టాడు. అర్జున అవార్డు పొందిన తొలి భారతీయ క్రికెటర్ సలీం దురానీ అని తెలిసిందే.
ఇవి కూడా చదవండి
క్రికెట్ తర్వాత సినిమా ప్రపంచంలోకి అడుగు..
సలీం దురానీ బాలీవుడ్ చిత్రం ‘చరిత్ర’తో సినీ రంగ ప్రవేశం చేశాడు. ఈ సినిమాలో సలీమ్‌తో పర్వీన్ బాబీ నటించింది. కానీ, ఈ సినిమా పెద్దగా ఆడలేదు. గతేడాది ఏప్రిల్‌లో సలీం దురానీ మరణించారు. అతను చాలా కాలంగా అనారోగ్యంతో ఉన్నాడు. క్యాన్సర్ వంటి సంక్లిష్ట వ్యాధితో పోరాడుతున్నాడు. 88 ఏళ్ల వయసులో గుజరాత్‌లోని జామ్‌నగర్‌లో తుది శ్వాస విడిచాడు.
మరిన్ని క్రీడా వార్తల కోసం ఇక్కడ క్లిక్ చేయండి..
